Jesús bilaabu buñgudxlio órni goitybu por buñ (Mateo 20:28). Por ngú, la Biblia ná que Jesús nac ni ralaa buñ (1 Juan 4:14). Né láaca náni que «diti noʼ stoib ni labúu guilaa buñ, portín Dios diti ma bidzel ni toib buñ ló gudxlio ni labúu guilaa lóono» (Hechos 4:12).

 Jesús goity por guirá buñ ni rap fe lóbu (Hebreos 2:9; Juan 3:16). Después, Dios golís láabu lad gueʼet né Jesús bibiguet lainy guibá xomod toib espíritu (Hechos 3:15). Desde lainy guibá, Jesús labúu «guilaabu guirá ni rabigax ronoʼ Dios por láabu, portín guirá ór nabanybu par gacnébu buñ» (Hebreos 7:25).

¿Xigony raquiinno que Jesús guiniʼ por lóono?

 Guiráno nacno buñ galkié (Romanos 3:23). Galkié rinéni buñ ló galgoity né ronyni que diti guibigaxno Dios (Romanos 6:23). Per Jesús nacbu xomod «toib ni racné» a guirá buñ ni rap fe ló xcalgoitybu (1 Juan 2:1). Jesús goity por lóono por ngú labúu guiniʼbu por lóono, par guicadiag Dios oración xtunyno né guitudybu scásiʼ xcalkiéno (Mateo 1:21; Romanos 8:34). Dios racapy guirá ni ranab Jesús portín noʼni de acuerdo né ni nábu. Láabu bixelbu Jesús ló Gudxlio «par labúu guilaa buñ por láabu» (Juan 3:17).

¿Nosi raquiin gony buñ crer lóo Jesús par labúu guilaa la?

 Yaca. Ná rasac gonyno crer ló Jesús par labúu guilaano, noʼra más ni raquiin gonyno (Hechos 16:30, 31). La Biblia ná: «Xomodca cuerpo ni diti nap espíritu ma goity, scúca fe pal diti noʼ ni ronyni ma goityni» (Santiago 2:26). Par labúu guilaano non:

•   Guisuidyno de Jesús né Bixiosbu, Jehová (Juan 17:3).

•   Gapno fe lóoyibu (Juan 12:44; 14:1).

•   Guislooyno que napno fe órni rasobno ni rony mandaryibu (Lucas 6:46; 1 Juan 2:17). Jesús goniʼ que diti guirá ni gaiby láabu «Señor» labúu guilaa, nosi ni ñony ni ná Bixiosbu labúu guilaa (Mateo 7:21).

•   Non guislooyno que napno fe ná cacalóno galnagan. Jesús goniʼ: «Per ni sony guantary dada dzú guidxin fin salaa» (Mateo 24:13).