Testigos xtuny Jehová por ni noʼdo lad religión né ronydo ni rasuidy la Biblia diti rioʼdo lad partid. Diti nacdo toib grupo de buñ ni noʼ lad partid, diti rony votardo por ni toib partid o buñchiin, láaca diti radopdo lagary ro riee buñ ni gony votar par tzoʼ toib buñchiin copy. Ló la Biblia rarexa xí razón noʼ por ni diti racdo toibsi né partid. Guisuidyno tipnés razón xigony diti racdo toibsi né partid:

•   Non guisuʼno mod buny Jesús, portín láabu diti gosaguelbu ñacbu buñchiin (Juan 6:15). Jesús goniʼ que xpiimbu láaca diti non gac «toibsi né gudxliogoxreʼ»; por ngú, diti non ñacnébu o ñoʼyibu lad toib partid (Juan 17:14, 16; 18:36; Marcos 12:13-17).

•   Lóono non tzoʼno lad Gobierno xtuny Dios, Gobierno ni bisetlaa Jesús órni goniʼbu: «Né diitz sacró xtuny Gobierno reʼ sioʼni ló guidopynac gudxlio» (Mateo 24:14). Por ni noʼdo lad Gobierno xtuny Dios, diti rioʼdo o racdo toibsi né partid ló guirá gudxrop ronoʼdo o lagary ro rabésdo. Scú láani, lóodo napdo toib dxiin: guisuidydo buñ que Gobierno xtuny Dios mápa mer guidxinni (2 Corintios 5:20; Efesios 6:20).

•   Por ni diti rioʼdo lad partid labúu rasuidydo de Gobierno xtuny Dios a guirá clas buñ ni diti rony pensary xomod lóodo. Cós ni ranido né ni ronydo, raslooyni que napdo confianz ló Gobierno xtuny Dios né que láani sabeʼni guirá galnagan ni noʼ ló Gudxlio (Salmo 56:11).

•   Pal ñacno toibsi né partid, ndeʼ ñony que diti labúu nadzakdo guirá xhermando ni noʼ guidopy ló Gudxlio (Colosenses 3:14; 1 Pedro 2:17). Religión ni rioʼ lad partid diti labúu raguaʼyibu toibsi né saʼyibu (1 Corintios 1:10).

 Gapno respet buñchiin. Ná diti rioʼdo lad partid, napdo respet buñchiin. Modreʼ rasobdo ni rony mandary Romanos 13:1: «Guirá buñ guisob ni ná buñchiin». Rasobdo ni ná leyes xtuny buñchiin, raguiixdo impuestos. Láaca racnédo órni buñchiin ná gonydo toib cós ni racné par guibanydo sacró lagary ro rabésdo. Dipa ronydo por guicaado ló ni ná buñchiin gony; ni ronydo ngú rasobdo ni ná la Biblia órni raibyni lóodo que guinabdo «por guirá ni rony mandary né por guirá buñchiin», né ronydo láani órni nacni par gacnéni religión ni noʼdo lad (1 Timoteo 2:1, 2).

 Láaca napdo respet, derech ni nap tigaaga buñ pal náyibu gacyibu de toib partid. Órni rioʼ votación diti rayopydo mod par diti gacni, né láaca diti racaado lóo buñ ni ná gony votar.

 Ni diti rioʼdo lad partid, ¿nicopyga pensary reʼ la? Yaca. Xpiin Jesús né stipnés herman ni bibany ló xtzúbu diti goyoʼyibu lad partid. Toib libro ni rasetlaa tema reʼ náni: «Ná biluladxyibu que non gapyibu respet buñchiin, buñ ni cuanal Jesús diti biluladxyibu que labúu ñoʼyibu lad partid» (Beyond Good Intentions—A Biblical View of Politics [Más que buenas intenciones. La visión bíblica de la política]). Láaca toib teólogo ni laa Orígenes ni bibany ló siglos ll né lll, bicaʼbu: «Buñ ni rasob ni ná Jesús diti rioladxyibu gacyibu buñchiin».

 Por ni diti rioʼdo lad partid, ¿sagoʼdo galrradíil lad buñ la? Yaca. Buñchiin diti non guidzuibyibu portín lóodo nacdo buñ ni diti ragoʼ galrradíil. Toib guiich ni goleʼ Academia Nacional de Ciencias de Ucrania ló íz 2001 goniʼni xigony lóodo diti racdo toibsi né partid: Pentzi ló naareʼ buñ diti rioladx xigony testigos xtuny Jehová diti rioʼyibu lad partid. Né por ni diti gosaguelyibu goyoʼyibu lad partid, guirá nazi bianladx layibu né buny mal layibu». Guiich reʼca rasetlaa que órni Testigos godudyibu guirá galnagan reʼ «guirá ór gopyibu respet ley ni goyoʼ dzúcu», né «láaca gocyibu buñ ni natzaay xcalrrien né galán bunyibu dxiin ló granjas né fabricas» né que «diti goyoʼ ór nacalóyibu mandary xtuny nazi». Guiich reʼca bilox goniʼni que ni raluladx Testigos né dxiin ni ronyibu «diti ronyibu láani par coʼyibu galrradíil lad buñ».