LECCIÓN 8
¿Bixchen chhue lhatj Dios chhi da malh nha yelezi?
1. ¿Nhak bxhe de malh?
Tiemp den ba belhatj Dios nabia benach shluen dek bit gake yeseinite yuge da zed
De malh bxhen Yellʼlhiu kate Daxiwe wnhan de wenlhalle de nech. Leʼ nhake tu angl wen nha bit bi da malh nhape, per «dilla li bi yoʼon loʼ yichjlalldaʼoguen» (Juan 8:44). Bzelhallen dek sunxhenhe len, per tuze Dios chheyale gunxhenchho. Lhen tu de wenlhalle, bsiyen Eva, nhulhe nech, par uzenhage chie walhaz che Dios. Adán benhe txen nhulchie den bit bzenhage. Den bzunhe ka nsan yelezi nha yelegut par yugechho. Blhab Romanos 5:19; 2 Corintios 11:3.
Kate Dexiwe benhen dek Eva bit bzenhage che Dios, besun contr leʼ nha bit bzin dek tuze Jeoba chheyale nabie. Zan benach dzake txen Dexiwe dek bit dsende dek Dios nabie legake, por len Dexiwe «shnabian yichjlhashdaw gake». Blhab Juan 14:30; 1 Juan 5:19.
2. ¿Nxhinj yuge den bxe Dios?
Yuge den bxe Jeoba bit nxhinjen. Bene nech nha angl ka wake yesezenhage yuge den shnha Dios (Deuteronomio 32:4, 5). Leʼ benhe chhio par kuinchho udelhallechho shi gunchho da nhak wen o da malh. Shi chhekechho che Dios udelhallechho uzenhagchho chie. Blhab Santiago 1:13-15; 1 Juan 5:3.
3. ¿Bixchen chhue lhatj Dios chhi yelezi?
Jeoba chhue lhatj dek benach sue contr yeleunabia chie shlushze. ¿Bixchen ba benhe ka? Par ulhue deke nhitu yeleunebia bit sakeden gaklhenhen benach shi Jeoba bit gaklhenhe leʼ (Eclesiastés 7:29; 8:9). Lhau xop mil iz, ba gutebia deke benach bit nhaʼ sakede yunhite da malh, udile, nha yillwe. Blhab Romanos 9:17.
Per shi welhatjchho deke Dios nabie chhio, da zan banhez zichho (Isaías 48:17, 18). Ba zu galze, dek Jeoba yeke yuge bene shnebia benach. Bene yesezexj yichje lhau yeleunabia chie, bene kize yesenhite lhau Yellʼlhiu (Isaías 11:9). Blhab Apocalipsis 11:15.
4. ¿Nhak dzichho banhez yelexhenlhalle che Dios?
Daxiwe wnhan dek benach sunhe llin che Dios por ze dzak chie wen, lage por niche dzekde chie. Chhuxklhen yelexhenlhalle che Dios, yugechho wake ulhuechho lhau yelemban chechho dek Daxiwe chhunlallen nha deke nhakchho txen yeleunabia che Dios lage yeleunabia che benach. Blhab Apocalipsis12:10; 2 Pedro 3:9.
5. ¿Nhak ulhuechho deke nhakchho txen Jeoba?
Den yechuglhallechho, ulhuen shi chhaklhallechho nabia Dios chhio
De nechh, chheyale nezdchho nhak chhaklhalle gunxhenchhonhe nha gunchho kan shna religión deliʼ den shlueide Biblia (Juan 4:23). Lekseka, wake gunchho kan ben Jesús kate bit bchiz chie lhau udile o bene shnebia yellʼlhiu. Kaʼ ulhuechho dek bit nhakchho tuze yeleunebia che Daxiwe. Blhab Juan 17:14.
Daxiwe dsiyen bene par zunhe de zban nha de nhake de malh. Kate bit chhunchho deki, xmigchho nha bene lu yoʼ chechho wake sunle chechho o zunde chhio zban (1 Pedro 4:3, 4). Shi ka chhak chechho, ushagchho lhen bene chhekde che Dios nha chhunhe kan shna xtille. Ka, shlhuechho deke Daxiwe benlallen den wnhan deke nhitu bene ka uzenhage che Dios kate shtile da zed. Blhab 1 Corintios 6:9, 10; 15:33.
Yelechheke den nhape Dios por chhio, dxhenlhallen chhio deke yekeʼ yelezi nha de malh. Bene chhezelhue deke dsejlie che Jeoba, yesebanhe tushize lhau Yellʼlhiu. Blhab Juan 3:16.
