Ohulumeni abaningi emhlabeni wonke bayakwenqabela ukuba abantu bahlangane, bafuna nokuba abantu bangasondelani. OFakazi BakaJehova bazimisele ukulalela uhulumeni bebe beqhubeka behlangana ngendlela ephephile. Ukuze amabandla abe nemihlangano aye asebenzisa ama-app anjenge-Zoom.

 Ukuze sibe nemihlangano njalo nengenazo iziphazamiso, iNdikimba Ebusayo yagunyaza ukuba kusetshenziswe iminikelo ukuze kukhokhelwe ama-akhawunti e-Zoom azosetshenziswa amabandla. Lokhu kuwasize kakhulu amabandla abengenayo imali yokukhokhela i-akhawunti ye-Zoom engaba ngu-R258,65 kuya ku-R344,87 noma ngaphezulu. La mabandla ebesebenzisa ama-app axhuma abantu abambalwa noma angaphephile. Wonke amabandla asebenzisa ama-akhawunti e-Zoom akhokhelwa yinhlangano angakwazi ukulawula kalula ezokuphepha nokuvumela abantu abaningi ukuba baxhume ukuze balalele imihlangano. Kuze kube manje, angaphezu kuka-65 000 amabandla asebenzisa la ma-akhawunti emazweni angaphezu kuka-170.

 IBandla laseKairagi, eManado, eNyakatho yeSulawesi, e-Indonesia, layeka ukusebenzisa ama-app amahhala labe selisebenzisa i-Zoom ekhokhelwa inhlangano. UMfoweth’ uHadi Santoso wathi: “Ngisho nabafowethu nodadewethu abangakwazi ukusebenzisa ezobuchwepheshe sebeyayithola imihlangano ngenxa yokuthi akusadingeki bangene kaningi emhlanganweni owodwa.”

 ULester Jijón, Jr., ongumdala eBandleni laseGuayacanes Oeste eGuayaquil, e-Ecuador, uthi: “Ngenxa yesimo sezomnotho sabafowethu nodadewethu abaningi, bekungenakwenzeka ukuba amanye amabandla akwazi ukukhokhela ilayisense ye-Zoom engavumela ibandla lonke ukuba lihlanganyele imihlangano. Manje, ngenxa yokuthi sine-akhawunti ye-Zoom engaxhuma abantu abaningi, sesiyakwazi ukumemela abantu emhlanganweni ngaphandle kokwesaba ukuthi sizokweqa inani elilindelekile.”

 Nakhu okwabhalwa uJohnson Mwanza, ongumdala eBandleni laseNgwerere North eLusaka, eZambia: “Abafowethu nodadewethu abaningi bathi, ‘i-Zoom ekhokhelwa yinhlangano ayigcini nje ngokusenza sizizwe sisondelene nabafowethu nodadewethu, kodwa isenza siluzwe uthando lukaJehova nokukhathalela kwakhe.’”

 La ma-akhawunti akhokhelwa ngemali ebekelwe ukusiza lapho kunezinhlekelele. Le mali itholakala eminikelweni yomsebenzi womhlaba wonke. Eminingi yale minikelo yenziwa ku-donate.mt1130.com. Siyanibonga ngokunikela ngesandla esivulekile, iminikelo yenu isiza nakwezinye izinhlekelele emhlabeni wonke.—2 Korinte 8:14.